Cora
Ɨ TƗ AJAꞌYEE TYAJAꞌRÁNAMUAJ
Ɨ tɨ áꞌyuꞌsiꞌij mej mij jaataséejrata náayarij nyuucaj jɨmeꞌ
Joꞌtɨj jáaɨꞌrij maj jaꞌráꞌastij ɨ maj puasaaruveꞌej aꞌájna a Estados Unidos México maj jaꞌráacɨj aꞌyaa mu tyihuaꞌhuɨɨreꞌ néijmiꞌcaa íiyeꞌej Mexico maj huatcháatɨmee, ajta quee aꞌɨ́jna jeꞌej, jeꞌej maj tyityecháatɨmee:
1) Yuꞌxarij maj jɨn jáamuaꞌree aꞌtɨ́j paj pueꞌeen. Aꞌájna joꞌtɨj jáaɨꞌrij maj jaꞌráꞌastij ɨꞌríj paj jaatáhuoonyij aꞌɨ́jcɨ ɨ pasaportej, jaꞌ matríiculaj aꞌáa tɨ jaꞌajtyámaꞌcan joꞌtɨj jáaɨꞌrij paj jaꞌráꞌastij ajta jeꞌen paj jaatáhuoonyij jaꞌ credenciaj ɨ paj jɨn tyuꞌ votaadoj íiyeꞌej México. Aꞌíjna ɨ tɨ tyiꞌhueeicaj jitze pu áꞌyuꞌsiꞌ jeꞌej paj ántyapuaj ajta jeꞌen jaꞌnyéerimij. Aꞌɨ́ɨ pu muatyáhuɨꞌrii ajtyapuaꞌ ɨmuaj a Estados Unidos pej pij banco joꞌtyájrutyej, paj tyiꞌhuaꞌnajchiyeꞌen cheéquej jɨme nusu paj jaꞌyójmuaꞌ ooyuꞌxaj joꞌmaj tyojóomuaꞌtyej. Pataꞌaj tyoꞌcáaxaj aꞌájna a MEXITEL (1-877-639-4835) tɨpuaꞌaj a jitze juxɨeꞌveꞌej sɨ́ɨj aꞌɨ́jna ɨ yuꞌxarij.
2) Joꞌmaj néijmiꞌi tyeꞌjeꞌyuꞌxaj jeꞌej tɨ sɨ́ɨj tyiꞌchej. Tɨpuaꞌaj México paꞌmaꞌcantaj peꞌ íitan nusu petyáatan majta jeꞌen jaꞌyójmuaꞌ aꞌáa joꞌnánɨeꞌhuacaꞌ aꞌ Estados Unidos, aꞌyaa pu tyíɨꞌrij paj huoꞌ registraadoj aꞌájna joꞌtɨj jáaɨꞌrij paj jaꞌráꞌastij, aꞌyaa mu mij huaꞌpuaquej tyaranamuáaraj muaꞌjuꞌun. Aꞌyaa pu ajta tyíɨꞌrij paj aꞌáa joꞌréꞌnyej joꞌmaj jáaꞌasacaa ɨ maj puasaaruveꞌej tɨpuaꞌaj páaxɨeꞌveꞌej paj huatyényeɨichej pej pij pajta aꞌyan tyiꞌnyéɨɨchej puaꞌraꞌnyij íiyeꞌej México.
3) Tɨ muaatyáhuɨɨreꞌen. Páamuaꞌreerej tɨquée aꞌɨ́jna jeꞌej jeꞌej paj tyiꞌchej, séejreꞌ tyiꞌtɨ́j paj jɨn huatácɨpuaj aꞌájna a Estados Unidos. Aꞌɨ́ɨmaj ɨ maj aꞌɨ́jna jɨn antyúumuaꞌree maj huotyéchaꞌɨɨn aꞌɨ́ɨ mu ajapuá huatányuusij majta jeꞌen tyámuaꞌ tyimuaatéꞌexaatyeꞌej jeꞌej paj huárɨnyij. Majta mu muaatáhuɨɨreꞌsij tɨpuaꞌaj tyiꞌtɨ́j jɨn jeꞌej puaꞌaj petyoꞌtyáꞌɨtzeereꞌen. Pataꞌaj aꞌáa jaꞌtanyéj joꞌmaj jáasacaa ɨ maj puasaaruveꞌej pej pij jéetzeꞌ jáamuaꞌree jeꞌej paj tyuꞌmuárɨeꞌen nusu maj muiꞌráꞌityacaꞌ nusu maj quee tyimuaanájchi, maj muatéꞌexaatyeꞌen tɨpuaꞌaj jeꞌej tyíɨꞌriitan pej pij tyámuaꞌ naa aꞌáa tyejeꞌcháaj puaꞌraꞌnyij a Estados Unidos, paj huohuoonyij aꞌtyeɨɨtyeristyamua maj huoꞌvíviꞌ nusu ɨ maj joꞌvátzɨj, maj muaatáhuɨɨreꞌen tɨpuaꞌaj mequee tyámuaꞌ mojoꞌseejra nusu jeꞌej puaꞌaj mamuaꞌuurej, maj tyihuoꞌtaꞌan ɨ tɨ tyiꞌcueꞌriꞌ ɨ huaꞌyóojmuaꞌ tɨpuaꞌaj ɨ maj huatóotoj, ajtáhuaꞌaj séecan jɨmeꞌ.
4) Yuꞌxarij paj jɨn tyoꞌxáꞌpuɨꞌɨntareꞌen. Tɨpuaꞌaj ajitze juxɨeꞌveꞌej paj tyiꞌtɨ́j ooxáꞌpuɨꞌɨntareꞌen aꞌájna a México pajta quee pújoorej paj ujoꞌmeꞌen, aꞌɨ́jna ɨ yuꞌxarij paj jɨj tyoꞌxáꞌpuɨꞌɨntareꞌen pu muaatyáhuɨɨreꞌsij. Aꞌɨ́ɨ pu ɨ yuꞌxarij tyuꞌtávej tɨꞌij aꞌtɨ́j ajitze maꞌcan tyoꞌxápuɨꞌɨntareꞌen yaa tɨꞌɨj ɨ sɨ́ɨj tɨ tyiꞌijchaꞌɨj, nusu tyiꞌtɨ́j tɨ huánanɨej nusu tɨ jaatoj ajta yaa tɨꞌɨj ɨ maj huatóotoj. Ajtyáxɨɨrij aꞌájna joꞌmaj jáaꞌsacaa ɨ maj puasaaruveꞌej pej pij néijmiꞌi tyuꞌmuaꞌreej.
5) Maj tyihuaꞌmuaꞌtyej majta ɨ maj tyihuáꞌhuaatyeꞌ. Ɨ maj aꞌɨ́jna jɨn antyúumuaꞌree metyiꞌijchaꞌɨj tyiꞌtɨ́j maj jɨn neín xɨcaj tzajta muaatáhuɨɨreꞌen aꞌájna a Estados Unidos. Aꞌɨ́ɨ mu muaatáhuɨɨreꞌsij mej mij castíran muamuaꞌtyej nusu ɨ huaꞌ nyuucaj aꞌɨ́ɨjma, ajta aꞌyájna aꞌɨ́ɨ mu majta tyámuaꞌ muaꞌuurej pej pij tyuꞌmuárɨeꞌen. Aꞌɨ́ɨ mu majta jamuaꞌreej joꞌtɨj jáaɨꞌrij mej mij tyimuáahuaatyeꞌen tyij pajta quee áꞌyuꞌsiꞌ aꞌájna majta jeꞌen quee aꞌchu muajijveꞌen. Ajta aꞌyájna, ɨꞌríj maj tyoꞌcáaxaj mej mij muaatáhuɨɨreꞌen joꞌpaj jaꞌmaꞌcan. Capáj jeꞌej tyíꞌmuaꞌaxcaj sulu pataꞌaj tyuꞌtaꞌíhuoꞌon aꞌíjna jɨmeꞌ
México pu jitze séejre joꞌmaj jáasacaa ɨ maj puasaaruveꞌej ajta quee mujaꞌ ɨmuaj putyajaꞌrɨcɨj. ¡Pataꞌaj aꞌáa jaꞌtanyéj!