Mixe
Ja kujaaybë mëdyiibë kumëdyaakp ja ajxy yꞌeeꞌpëëkꞌadaambyë jëduꞌunë jëyaꞌay ajxy yakꞌixyꞌat yajmëdoyꞌadëëjët kunaax ayuukꞌaampy
Mëduꞌuntyë ja Mëj Kuduunk México Naax Jooty Kyugexyꞌajpyë mëdyiibë yaa Mërux Naax Jooty, ëdaa ajxy jeꞌe duꞌun tyuunkꞌajpy mëduꞌuntyë cham ñëgapxaꞌañ, jëduꞌun ja mexicobë jëyaꞌay ajxy pyuꞌubédët pën jaty jëduꞌun yaa yajpaatp ma ëdaa naax ëdaa kajptën, oy ajxy ënajty yaa otyeꞌemñepyꞌaambyë të myëch të tyëgëꞌëy:
1) Noky kyapxy mëdyi jaty jëduꞌun mmajëyaꞌayꞌádëp. Ma ja Mëj Kuduunk México Naax Jooty Kyugexyꞌajpyë, oy ja pasaporte jim myajpëdsë́mët, mëdyii mëchoꞌont xypyaatp ma ja nokyën ja Mëj Kuduunk México Naax Jooty Kyugexyꞌajpyën, tyats oyë credencial jim myajpëdsëëmbët jëduꞌun kuduunk México Naax Jootypë mbawingéxët. Yëꞌë tëgëëkpë noky kyapxy pedyëë kaꞌxyëë ja mxëë mdsuu yëꞌë xymyanëkxë tyadsë mꞌajaꞌañáxy. Oy yëꞌë yaa myajtuunkpaadaꞌañ Mërux Naax Jooty ku mgwenta ënajty myakꞌawaꞌadsaꞌañ ma bankën, ku cheque ënajty mguwidsaꞌañ o ku mnëëx mmajk ënajty myajkujaayaꞌañëë ma ja kapxtaaktëjkën. Oy jim mgapxypëdaꞌagët jëduꞌun ajxy jim xymyëjꞌwówët MEXITEL (1-877-639-4835) pë mdsojpy myajmaajyajpy ëdaa duꞌumbë noky kyapxy.
2) Agujtëjk. Pë méxicobë toꞌoxyëjk o méxicobe yaꞌadyëjk miich a pë yaa Mërux Naax Jooty ja mnëëx mmajk ajxy të myiñ të kyaꞌay, oy ajxy jeꞌe myajkujaayaꞌañëë ma ja Mëj Kuduunk México Naax Jooty Kyugexyꞌajpyën ku jeꞌe myexicobë jëyaꞌayë; a óyëts ajxy jeꞌe duꞌun mejtsꞌit xyënaxaꞌañ. Janë oy jëduꞌun mminaambë ma ja Mëj Kuduunk México Naax Jooty Kyugexyꞌajpyën pë mꞌagujpëgaamp ënajty a jëduꞌun ja mbëgyëëbë chobaadët jim México Naax Jooty.
3) Nëwaꞌañ guwaꞌañëëbë. Mjaꞌamyédsëp jëduꞌun, ooy ënajty yaa otyeꞌemñepyꞌaambyë të mmech të mdëgëꞌëy, mmëdë kuꞌudujt nëgyuwaanëk yaa Mërux Naax Jooty. Ja kuduunk kugapxy ajxy Nëwaamp Kuwaambë jeꞌe jeꞌe xyñëwaꞌanaamp tyats madyuꞌuꞌaampy xykyapxwijaꞌañ nepy ënajty myajmaajyatyën. Janë oy ajxy xywyinwowaambë jëduꞌun ajxy xywyingapx xyjyëjkapxëꞌëwët ku tii tsip xexpë ënajty mwinguꞌix mwingubaadëꞌëy ma yëꞌë ley myinëꞌëyën. Oy jim mnëkxët ma ja Mëj Kuduunk México Naax Jooty Kyugexyꞌajpyën ja maas mawingonbë, jëduꞌun ajxy xyꞌadij xyꞌawaanët ma yëꞌë kuduñëëbë myinëꞌëyën, ëxtaꞌamts nej ku ënaꞌk ënajty nëꞌënëgoobë të xyꞌëxpëboꞌoy ma mduñën o ku ënaꞌk ënajty të xykyaꞌamëjúy; ma yëꞌë ajxy jëduꞌun ijxp yajkopkëëbyën ku ajxy yaa të ñaxy, pë jiijë yꞌanëë yꞌaduꞌu nepyꞌaampy jëduꞌun myajtuꞌuyoꞌoyët ku yaa Mërux Naax Jooty oy mꞌídët; ku ja mjujy mmëguꞌuk ënajty mꞌëxtaꞌawaꞌañ pën të chumy të myachëë o pën të tyëgoy o kaꞌa yajpaatp; xypyuꞌubédët ajxy ku ënajty mwinguꞌix mwingubaadëꞌëy ku ënajty pën xypyexy xytyeeñ o ku ënajty mjëën jooty mdëgooty mdsippaady mmaꞌatpaady; ku ja mnëëx mmajk ñëgaayëëk ñëꞌuukëëk ënajty myujꞌwaanë ku ajxy ënajty të mnëyꞌëxmachëë, mët jak madyuꞌu jaty.
4) Noky Mëj Kuꞌudujt Mëëtpë ku Pën Xyjyëdsoꞌokꞌádët: Pë jim myajmaajyáty ku tii tsipë xexpë myajtëdyëgëꞌëwaꞌañ ma yëꞌë ley myinëꞌëyën jim México Naax Jooty pero kap oy mꞌamdso nëkxaꞌañ, ja Noky Mëj Kuꞌudujt Mëëtpë ku Pën Xyëdsoꞌokꞌadët jeꞌe jëduꞌun oy xypyuꞌubedaamp. Ja Noky Mëj Kuꞌudujt Mëëtpë ku Pën Xyjyëdsoꞌokꞌádët oy jeꞌe tyuunkpaady ku wiinkpë mgugexyꞌádët mjëdsoꞌokꞌádët jëduꞌun jeꞌe myawëdit yajwëdítët pë jim ënajty tii yajꞌyajtëdyëgëꞌëwaꞌañ ma yëꞌë noky kumëdyaakpën ku pën tii të myajmamëꞌëmëꞌëy, ma ja noky kumëdyaakpë ku të kyuꞌudúky ma ja juyëëbë toogyëëbën o ku ënajty pën ñëyꞌëxmadsaꞌañëë. Mëjꞌyoꞌoy mëjnáx jim ma ja tëjkën ma ja Mëj Kuduunk México Naax Jooty Kyugexyꞌajpyën, jëduꞌun ajxy xykyapxtëëwët tii jaty ënajty myajtëw myajtëꞌxaampy.
5) Ja Kapxtaꞌagyëëbë mët ma ja Oyꞌajt Weenꞌajtën. Ma ajxy jeꞌe yajtuꞌuyoꞌoyën ja ajxy të kyumin të kyumedsëꞌëyëbë, jimë programë ajxy may myëëdë medyi jaty oy xypyuꞌubedaamp ma xëë dsuu duꞌun jabom jabom mmënaxy myajnáxyën Mërux Naax Jooty. Oy ajxy jeꞌe xykyexaꞌañ xyꞌawanan xyꞌadijánë ma ajxy yajkapxtaꞌaky yajnëꞌixëꞌëyën amëxán, amërux, ëxtë jeꞌe baady ku ja tun xaj ajxy xyajnëꞌixëꞌëwët. Janë jim ajxy kujaay kugeech myëëdëbë maa jaty nëkxy oy myajtsooyëꞌëwaꞌañ oyë seguro ënajty mgaꞌadeꞌemmyëëdë mët maa ënaxyë tsow jaty mgaꞌajuyaꞌañën. Janë jëduꞌun duꞌumbë, jiijë prográmabë mëdyii jaty jeꞌe myëduꞌugëëpy ma miich mgunaax mgugajptën. Yajtëw yajtëꞌx ëdaa duꞌun, kaꞌa mdsëꞌëgëꞌëy mdsëꞌëdyuñ maa ajxy ëdaa duꞌun tyuñ.
Jiijë México ja Mëj Kuduunk México Naax Jooty Kyugexyꞌajpyë winduum agón myëëdë ma miich myajpaadyën. ¡Mëjꞌyoꞌoy mëjnáx jim!