Zapoteco
Ga binni Zaguita ni noo guidxi Estados Unidos.
Pa binni Zaguita lii ne nabezaloꞌ guidxi Estados Unidos la? Ga Consulado stiꞌ guidxi Zaguita ni noo ndaꞌniꞌ guidxiriꞌ, zanda acané lii cueeloꞌ ga guiꞌchiriꞌ, sin ugooxaíquegabe ximodo uyooloꞌ ndaꞌniꞌ guidxiriꞌ.
1) Ga guiꞌchiꞌ ni riníꞌ tu lii. Consuladoga zanda acané lii cueeloꞌ guiꞌchiꞌ lá pasaporte, guiꞌchiꞌ lá matrícula consular ne cueeloꞌ ndaꞌniꞌ Zaguita credencial ni runivotarnéloꞌ. Guionna guiꞌchiriꞌ cá xláloꞌ ne lúloꞌ lúgani. Zanda iquiꞌñelogani ndaꞌniꞌ guidxi Estados Unidos para cueeloꞌ ti ra guiaba xpidxichiloꞌ ra banco, para uchaaloꞌ xchequeloꞌ o para ucaaloꞌ xlá xiꞌniloꞌ ra escuela. Pa caquiꞌñoꞌ tubi de ga guiꞌchiriꞌ la? Bicaaridxi ra MIXTEL (1-877-639-4835) ne ulee ti cita ne laꞌcabe.
2) Guiꞌchiꞌ ni riníꞌ para guleloꞌ. Pa binni Zaguita lii ne gule xiꞌniloꞌ ndaꞌniꞌ guidxi Estados Unidos, ne nooloꞌ aca baduhuiꞌniriꞌ binni Zaguita la? Zanda ucaaloꞌ xlábe ra consulado, ne scagá aca baduhuiꞌniriꞌ dxúꞌ ne binni Zaguita. Ne laꞌca zanda gueꞌdaloꞌ ra consuladoriꞌ pa nooloꞌ ichaganáꞌloꞌ ne nooloꞌ isaca endaxeꞌlaꞌ stiꞌloꞌ guidxi Zaguita.
3) Endanazaꞌcaꞌ stiꞌloꞌ. Cadi usiaꞌndaloꞌ napaloꞌ ga derecho stiꞌloꞌ ndaꞌniꞌ guidxiriꞌ, sin ugooxaíqueloꞌ ximodo uyooloꞌ ndaꞌnini. Ga binni runi dxiꞌñaꞌ para gapagaꞌ lii la? Noogaꞌ para guꞌyagaꞌ ne acanégaꞌ lii. Laꞌca noogabe para quixhegabe lii xneza pa napaloꞌ xixa bichenda ne xixa asunto legal. Bidxiña ra consulado ni noo jmá gaxhe de lii ti ma gannaloꞌ xi deiráꞌ zanda acanégabe lii, caꞌsi pa biladxi xpixuaꞌnaloꞌ lii de dxiꞌñaꞌ sin gannaloꞌ xinéꞌ o pa qui niguixebe lii biaꞌ dxiꞌñaꞌ biniloꞌ; zanda acanégabe lii uyubiloꞌ acachaꞌhuiꞌ ga xquiꞌchiloꞌ ti ma cuezaloꞌ scarú ndaꞌni Estados Unidos; laꞌca zanda acanégabe lii uyubiloꞌ ti binnilidxiloꞌ ni unáꞌzeꞌ policía laꞌ o ni biniti; ne laꞌca zanda guꞌyagabe lii pa bini feu binni lii o pa udiñe xheꞌloꞌ lii; laꞌca zanda acanégabe lii ne bidxichi idxela endarau gau ga xiꞌniloꞌ ora ma bisabixheꞌlaloꞌ, ne nooroꞌ jmá ni zanda acanégabe lii.
4) Guiꞌchiꞌ ni noo ndaꞌniꞌ náꞌ notario. Pa caquiꞌñeloꞌ gunichaꞌhuiloꞌ ti guiꞌchiꞌ ndaꞌniꞌ náꞌ ti notario ndaꞌniꞌ guidxi Zaguita ne qui zandadi chéloꞌ lii la? Ti guiꞌchiꞌ lá Poder Notarial zanda acané lii. Ne guiꞌchiriꞌ zanda gabiloꞌ tuxa ni noo guidxi Zaguita ché caꞌsi lii, ne ndiꞌ nga ga guiꞌchiꞌ ni zanda guinichaꞌhuibe: Ti testamento, ti guiꞌchiꞌ ni ucuaaloꞌ o ni bidíꞌloꞌ ra bitooloꞌ o uzíꞌloꞌ xixa ne guiꞌchiꞌ ni riníꞌ nezalú juez ma bisaꞌbixheꞌlaloꞌ. Ne pa noo xixa ni cadi cayeno la? bidxiña ra consulado stiꞌ guidxi Zaguita ti ma usienegabeni lii .
5) Endariziꞌdiꞌ ne endanazaꞌcaꞌ. Ga binni runi dxiꞌñaꞌ ra departamento lá comunidades la? napagabe jmá programahuiꞌniꞌ ni zanda iquiꞌñeꞌ lii laga nabezaloꞌ Estados Unidos. Zanda useꞌndagabe lii iziꞌdiloꞌ diꞌdxaꞌ stiá, diꞌdxaꞌ inglés, ne depe zanda useꞌndagabe lii iziꞌdiloꞌ jmá de ti dxiꞌñaꞌ. Laꞌca napagabe jmá lugar ra zanda guꞌyaꞌ doctor lii sin gapaloꞌ seguro ne sin quixo stale bidxichi. Ne cadi ngasidi, laꞌca napagabe programahuiꞌniꞌ ti ma gannaloꞌ xi cazaꞌcaꞌ xquidxiloꞌ. Bidxiña ne unabadiꞌdxaꞌ por irá ni napagabe para lii.
Guidxi Zaguita napa ti consulado gaxhe de lii. ¡Yegannani!